Hierdie groepuitstalling met diverse nuwe kunswerke van dertien kunstenaars van die Fakulteit Beeldende Kunste aan die Universiteit van die Vrystaat, sluit in installasie-, vertoon-, skilder- en drukkuns, beeldhouwerk en nuwe media. Dit verken verskeie interpretasies van die konsep grond braak – “breaking ground” – deur middel van konseptuele, metaforiese en materiële benaderings. Sommige kunswerke is gemaak van aardmateriale, terwyl ander temas uitlig rondom breek en verbreking weens vernietiging, erosie en verval, en ander die afbreekproses weer as ‘n vorm van skepping beskou. Sommige werke konfronteer die gevolg van verbreking, soos verlies en traumatiese geheue. Ander werke ondersoek hoe grense, rande en tegnologiese ontwikkeling ons begrip van grond en plek hervorm. Breaking Ground wys hoe kunstenaars eksperimenteer en nuwe maniere ontdek om oor verbreking, transformasie en veerkragtigheid te dink.