In Troep vertel meer as ‘n honderd veterane oor wat hulle van hul dienspligtyd onthou: hoe hulle opgeroep is terwyl hulle op skool was en weggegaan het oorlog toe om eers twee jaar later weer terug huis toe te gaan. Daar is stories oor troepetreine, duimry, grensdiens en landmyne, herinnerings aan vriende, seuns en broers wat nooit teruggekeer het nie. Bun Booyens bring al hierdie stemme bymekaar en vertel van die uitdagende omstandighede wat duisende jong seuns ervaar het. Veterane sal aanklank vind by hierdie verhale wat ook hul geliefdes sal help om te verstaan wat hierdie mense vandag nog saam met hulle dra: Dit wat hulle kan onthou en ook dit wat hulle eenvoudig nie kan vergeet nie.

Bun Booyens is die stigtersdirekteur van die reistydskrif Weg! en die redakteur van die dagkoerant Die Burger, waarvan hy ook ‘n eeufeespublikasie saamgestel het, Die Burger 100 – Sy Mense en Hul Stories (2016). Hy het ook 50 jaar met Fred (2020) oor die spotprentekenaar Fred Mouton, asook Ek Onthou – Die Lewensverhaal van ‘n Outistiese Seun (2021) geskryf. Bun was ‘n voetsoldaat tydens sy dienspligjare en werk deesdae as ‘n vryskutjoernalis.